🤔 De xuru que munchos nos sintimos bichos raros en dalgún momentu de la nuesa vida. Por tener gustos distintos a los de los demás, o cenciellamente por nun encaxar al 100% nos roles y estereotipos más habituales que nos impón la sociedá.
📚 Nesti llibru, la protagonista Keiko Furukura, paez nun encaxar en nada de lo establecido, tien 36 años, sigue soltera, nunca tuvo pareya nin ganes de tenela, y sigui trabayando por hores nun "konbini" un típicu supermercáu xaponés abiertu les 24 hores, nel que mozos, estudiantes, etc. suelen trabayar por un tiempu curtiu. Pero ella lleva ellí 18 años, toa una vida, y yá nun sabe esistir ensin la tienda, el trabayu ye'l so abellugu, y l'elementu que-y sirve de manual d'instrucciones pa vivir.
🔹 En nengún momentu se coménta si la protagonista tien dalgún tipu de trestornu, pero pola información que nos dan, tou paez apuntar a que sí. Tien muncha dificultá para rellacionase col so entornu, tien una falta total d'empatía, les conductes y emociones coles que se rellaciona con otres persones son por imitación, va deprendiendo qu'emociones tien de representar en cada momentu, y que tipu de conductes como si fuere una obra teatral pa poder mostrar los comportamientos adecuados pa cada situación.
🖊️A pesar del so aspeutu llano y simple, esta novela curtia ye una crítica brutal a la sociedá xaponesa, al machismu, a les imposiciones sociales qu'afecten a homes y muyeres (especialmente a estes postreres, como la maternidá, la vida en pareya, medrar nun trabayu que seya estable etc). A midida qu'avanza la hestoria, vas observando cómo la sociedá inflúi seriamente nes decisiones que toma Keiko, decisiones bien importantes qu'afecten por completu a la so vida y el so futuru. Tou porque ta suxeta a continuos xuicios morales y que toos al so rodiu xulguen la so forma de vivir.
💜 A midida qu'avances na hestoria, y sobremanera agora dexándola reposar, sigue faciéndome reflexionar sobre la propia realidá, y cómo munches vegaes vémosnos influyíos pola presión social. Asina que a pesar de l'aparente cenciellez del llibru y de la hestoria (y sobremanera lo bizarra que ye en delles coses), ye una llectura qu'acaba dexando un posu y que te lleva a replantegate munches situaciones vivíes.
Ningún comentario:
Publicar un comentario