"Rostros en el agua" de Janet Frame

 

🥺Hai llibros que si lus llees nel momentu "afayadizu" o al contrariu, según se mire, pueden facese agobiantes y nun ser quien de somorguiate por completu nes sos páxines porque precises parar cada poco y tomar aliendu.

🖋️Esto pasóme con Rostros en el Agua de Janet Frame. Esti llibru nació como escritura terapéutico indicada pol psiquiatra de l'autora, pa intentar superar los años y años d'internamientu en distintos y terroríficos hospitales psiquiátricos, terapies d'electroshock y una casi inminente lobotomía cerebral qu'amenaciaba la so vida y la so salú, y de la que se llibró unos díes enantes gracies a ganar un premiu lliterariu nacional.🍀

❤️‍🩹El llibru navega ente la ficción, la autoficción, l'autobiografía... L'autora trató de recordar de siguío que nun yera la so biografía y que nada de lo qu'ellí se cuntaba yera verdaderamente real, pero lo cierto ye que ta basáu na so vida y na so hestoria, anque con dalgunos cambios. Pero la esencia ye la mesma. 

🥺Avéranos a la soledá que sintió durante toos esos años, el menospreciu, el constante tratu peyorativu de les enfermeres, l'anulación como persona, el constante mieu, terror y llerza de ser sometida a “tratamientu”, ye dicir a electroshocks. .

😢Ye una novela tremendamente afogadiza, que tuvi que dir amestando con otres más llixeres y espaciarla, porque llégase a sintir la presión y la llerza de la espera, la monotonía y l'aburrición d'una vida na que te traten como un oxetu, el fríu de les habitaciones y sobremanera la soledá.

💚Una llectura bien recomendable, pero que creo que ye meyor llegar a ella conociendo anteriormente la vida de l'autora, y sobremanera sabiendo lo que vas atopar. Nun hai contestu, nin esplicación de lo que ta pasando, solo'l continuu pensamientu y aforfugu d'una muyer que dexen ensin decisión, ensin poder, ensin voluntá a mercé de lo qu'otros quieran faer con ella, col so cuerpu y cola so mente.