Coyí esti llibru con munches ganes, ye un llibru infantil-xuvenil pa llectores intermedios, que trata sobro un tema que me paecía bien interesante: Los nuesos mayores.
Nesti casu la hestoria de la nuesa protagonista, una moza que va pasar unos díes cola so güela al pueblu, obligada polos sos padres, y la güela desaparez.
Pensaba que'l llibru diba tratar el tema dende otru enfoque. Ye ciertu que a l'entamu del llibru la neña ta bien enoxada por que nun quier pasar esos díes cola so güela, y nun amuesa nengún ciñu o almiración escontra ella, y según va avanzando'l llibru esto va camudando, y cada vez afaya cualidaes de la so güela que-y gusten y va camudando d'opinión. Sicasí esto failo d'una forma, en mi opinión, demasiao simple y con un vocabulariu demasiáu vulgar. Entiendo que ye un llibru pa neñes/os y que debe tener un llinguaxe cenciellu d'entender, y que ye un llibru con humor, polo qu'inténta tener un llinguaxe más cenciellu y corriente, pero esto, pa mi, fizo que la llectura fora en dellos momentos fastidiosa. Utilizando na mesma frase delles palabres y/o espresiones vulgares (chucho, porrazo...), que camudando dalgunes d'elles pa min ganaría enforma ensin perder l'humor.
Puede ser un llibru que funcione igualmente coles moces/os precisamente por esto, pol llinguaxe vulgar y simplón, como funcionaron últimamente otres colecciones como El Diariu de Greg y similares. Pero baxo'l mió puntu de vista, un llibru bien escritu fai que les moces/os tamién se engabiten a la llectura y llean llibros de calidá.
Lo que me prestó del llibru ye que seya ilustráu, y tenga viñetes en delles páxines, y como dicía antes, el tema paezme un tema a trabayar y nel que nun hai munches publicaciones pa estes edaes. Que la reciella y los adultos nos demos cuenta del valor de los nuesos mayores, les coses que pueden y quieren facer, y les problemátiques y enfermedaes que pueden dir sofriendo (demencia etc) y deprender a convivir con ello y dayos sofitu.
Ningún comentario:
Publicar un comentario