Dientro d'esta colección atopamos esti llibru, que ye la primera parte d'un proyeutu de colección de llibros infantiles escritos en castellán nomau, El Llibru la Viesca (En castellán EL libro del Bosque), que la desapaecida editorial madrileña Orión entamó nos años 40. Seguiría-y "Suca y l'Osu", del que vos falaré otru día, dambos textos escritos por María Josefa Canellada , Sicasí, la colección paecía tener continuación pero nin la familia de l'autora nin la editorial pudieron recuperar nengún títulu más, nin saber si salieron a la lluz o quedaron perdíos na solombra d'aquellos años.
La presente edición, ta ilustrada por Sandra de la Prada, y la torna al asturianu fecha por Mar Martín. Ye una edición perguapa y cuidada, en tapa dura y con unes ilustraciones a páxina completa y a tou collor.
Nesti llibro cuéntase la vida de Tanín, el fíu del Tíu Tanón y de la Tía Tana, que yera un mozu que nació n'una casa que taba nel mediu la viesca, aíslada´l mundu, y que namás baxaben al pueblu una vegada al añu. Esto facía que Tanín nun supiera facer coses qu'otros neños facíen, como lleer o escribir, pero taba per xuníu a la viesca y a la naturaleza. Nel llibru descríbense actividades que Tanín facía na viesca, apaez muncho vocabulariu sobre los animales y vexetación que hai n'ella, el comportamientu de dalgunos animales etc Polo qu'amás de ser una hestoria de ficción bien guapa, ye un relatu que sirve pa conocer más sobre la flora y fauna de los nuesos montes, y pa que la reciella aprienda vocabulariu sobre los mesmos. Siendo esto bien importante, pos cada vez los neños están más alloñaos de la naturaleza y ye per importante reforzar esto.
Ye un llibru bien recomendable y que presta muncho lleer, una llectura afayadiza pa facer en familia o pa trabayar con un grupo, ya que da muncho xuego a l'hora de facer actividaes etc
Déxovos unes semeyes del interior del llibru.
Gracies por lleer y compartir con quien pienses que-y puede prestar.
Ningún comentario:
Publicar un comentario