"Cuando yo tenía 5 años, me maté" de Howard Buten

PUNTUACIÓN: 4,5/5

Sinopsis


Burt namás tien ocho años, pero'l so pequeñu corazón yá conoció grandes sentimientos. Demasiáu grandes. Demasiáu fuertes. Agora vive recluyíu nun Centru d'Internamientu Infantil polo que-y fixo a Jessica. Solo, contra la babayada de los adultos que convierten los sos suaños en síntomes clínicos y el so amor nun delitu. Solo, n'una fortaleza de silenciu. ¿Quién lo sacará d'ellí? Pura emoción, n'una prosa maraviosamente consiguida.

Opinión

Bones! Como tais? Güei vengo a falavos d'esti llibru escritu nel añu 81 pero que yo nun sabía qu'esistía hasta fae unes selmanes que volvió a ser editao en castellán pola editorial Blackie books, y del que hsi una película francesa que yo nun m'atreví a ver pol miedu a la decepción.

Antes de animame a lleelo vi dalgunes crítiques que decíen que yera un desos llibros indispensables que había que lleer si o si, y l'argumentu, la temática y les opiniones ficieron que me decidiera a lleelo.

La verdá ye qu'esti llibru llegóme a les coraes, y fíxome reflexionar sobre'l xeitu nel que tratamos a los neños y les neñes. Dacuando quitándo-y importancia a lo que sienten, a lo que piensen,o a lo que yos preocupa.

Nesta hestoria'l nuesu protagonista, el pequeñu Burt ye un neño que me llegó al coral y que me fizo sentir rabia, impotencia y ganes de demostra-y al mundu, y sobre todo a dalgún personaxe de la obra, que magar que ye un neño cun calter especial nun ye un socíopata como quieren facenos creer, y que deberíemos de facer un exercicio de reflexión y escucha colos neños y neñes que tenemos cerca.

La hestoria ye bastante áxil y de llectura rápida. Dende l'entamu amuésasenos un misteriu que arrodia a Burt, y ye que sabemos que-y fizo daqué malo a Jessica, una collacia, y esta acaba nel hospital por esti motivu.  Esto fainos caltener la atención intentando pescudar que sería lo que asocedió y si de verdá sería tan grave como dicen, ya que'l protagonista tien apenes 8 años. Amás durante la llectura'l narrador, en primera persona, va cuntando tou lo que-y asocedé nel centru d'internamientu infantil nel que se alcuentra desde que-y fizo eso a la so collacia, y va faciendo saltos nel tiempu nel que nos va contando anéctodes de la so vida fuera desde los 5 años hasta que-y pasa eso con Jessica, ye nesi momentu, cuando descubrimos lo que de veres asocedió cuando termina la hestoria.

A min de veres prestome muncho, Burt ye un personaxe fantásticu al que-y collí ciñu dende les primeres paxines, un nenu directu, llistu, al que traten de antisocial, sociópata, poco cariñosu y que pa min nun ye mas qu'un neñu incomprendíu, enllenu d'amor y con unos sentimientos pergrandes.

Recomiéndovoslo 100%!!!