"Ninfea" de Francis Novoa

PUNTUACIÓN: 3,75/5

Sinopsis:

Cansáu de se-y fiel a la so muyer durante milenios, l'inquietu Cupido arrenunciu a los sos poderes divinos escapándose del Olimpo y baxándose a la Tierra, para perdese nel llugar más correnderu del mundu en busca de folixa y diversión: España. La so muyer Psique, engrifada por esti motivu, esixe a los sos suegros Marte, dios de la guerra, y Venus, diosa de la guapura, la so cabeza. Dambos dioses, medrosos de que l'escándalu se supiera nel Olimpo y lleguase a oyíos del omnipotente y cornudu Vulcano —dexando n'evidencia'l romance qu'inda viven la so muyer y el dios de la guerra—, manden a una ninfa para cumplir con dicha misión. Y nun se trata d'una cualesquier: unvien nada menos que a Ninfea, a la que milenios antes Cupido flechó por erru cuando pretendía da-y a Diana,

diosa de la caza, y a la qu'ignoró por completu. Por esi motivu, Ninfea suicidóse afogándose nun llagu. Diana convirtiola en Nenúfar, y asina, cola forma d'una planta acuática —y más aburrida qu'una ostra— vivió flotando sobre un llagu polos sieglos de los sieglos. O siquier hasta que Marte y Venus necesitaron los sos servicios pa buscar y esaniciar a Cupido na Tierra so la más absoluta discreción en cuenta de otorga-y la so antigua forma corporal. Ninfea va poder cumplir el deséu que tuvo guarando por tola eternidá y nun dulda n'aceptar la ufierta... anque lo que va asoceder n'España va alloñase enforma de lo que ye la discreción. Esta ye la hestoria d'una venganza a niveles apocalípticos como nunca antes se viere. Una vendetta que va arrasar con toos al so pasu trespasando les fronteres de la mitoloxía y la realidá. Porque nun hai nada peor que la ira desamarrada tres el despecho milenariu productu del desengañu pol falsu amor d'un home

Opinión:

Collí esti llibru con mieu de si me prestaría o si nun serían quien a terminar de lleelo dempués de sentir delles opiniones del, toes bien diferentes, llegando a tar nuna presentación col propiu autor que reconoció que hai a xente que-y prestó lleelo y xente que se atrevió a deci-y que como podía una editorial llegar a publica-y esti llibru.

La verdá ye que ye un llibru que nun anda con rodios, un llibru cargao de violencia, d'escenes bestiales y d'anécdotes que revuelven l'estómagu. Ye una publicación que nun sería quien a catalogar nun únicu xénero lliterario, por que amesta varios dellos. Ye un llibru con toques d´humor, con sátira, con crítica social, con terror, con sexo explícito, y que fai que nuna páxina seyas capaz de reirte y dos párrafos embaxo  espantate.

El llibru lleese bien rápido, por que ye cortín y por que la hestoria faise amena de lleer (yo devorelo nuna tarde), pero a min dexóme un poquitín con ganes d'afondar na hestoria. Ninfea lleva a cabo una venganza, y munchos de los homes de los que se venga (si, solo son homes) cáente mal namás aparecer na hestoria, pero con otros date la sensación que nun llegues a conocelos y a saber el mal que ficieron pa merecela, los personaxes desfilen delantre de ti, pero nun llegues a conocer toa la hestoria, a metete na piel de Ninfea pa sentir como s'alcuentra y por que ta tan despechada como para llevar a cabo una venganza tan bestial.

Aparte desto la hestoria, por ser tan diferente a too lo que lleera enantes, prestóme, y tamién pola parte de crítica social y feminista que s'escuende tres d'ella, y por crear un personaxe tan diferente a los que tamos avezaes como ye Ninfea.

En resumen, ye una llectura diferente, y como diferente que ye a min prestóme lleela y conocela, eso si, nun ye un llibru apto para persones sensibles 😆 Pero si nun sois remilegaos, yo  de xuro, recomíendovosla!!

Daquíen la conocía?