"Thornhill, orfanato para chicas" de Pam Smy

Puntuación 5/5

Bones! Que tal? Equí toi de nuevu dempués dun bloquéu llector sobrehumanu'l de les postreres selmanes. Llevaba muncho ensín publicar pero tamién ensín lleer. Sicasí, durante esti tiempu nel que nun fuí quien de terminar nengunha llectura, si fuí quien de lleer esti llibru que vos traigo güei y que ye una novedá de Blackie Books "Thornhill, orfanato para chicas". Déxovos la sinopsis.


Sinopsis:
«Ella volvió. Del mieu éntrenme respigos, que me percuerren el llombu dende la nuca. ¿Y agora qué faigo?» En Thornhill, un orfanatu encantáu, el terror puede nun venir de les pantasmes, sinón de les neñes que duermen al to llau. Y la amistá, de les que lleen el to diariu munchos años dempués..

Opinión:

Bono, pa entamar, por que dempués d'un bloqueu llector como'l d'estes selmanes fuí quien de lleer esti llibru nuna tarde, y otros non? Una de les razones ye'l formatu, magar tener unes 500 páxines amesta ilustraciones ensín testu con pequeñes cartes d'un diariu personal de la protagonista, esto fae que seya bien áxil la so llectura y que puedas lleelo nun par de hores.
Yo nun soi muncho de noveles gráfiques, y menos ensín testu, pero n'esti casu creo que ye bien acertáo, ya que al traviés de les ilustraciones vemos una parte de la hestoria, y al traviés de los testos de la protagonista descubrimos los sucesos más personales, lo que piensa y lo que siente.
Esti llibru amuésanos una hestoria dura, cruel y que respiga, na que'l tema principal ye'l acosu escolar, un tema a la orden del día y que tanta falta fae visibilizar y siguir trabayando pa acabar con él.
Una de les coses que más me llamaron l'atención y que más me ficieron reflexionar de lo que contaba la protagonista yera cuando s'entrugaba si les persones adultes que taben al so rodiu (profesores, cuidadores etc) nun se daban cuenta de lo que taba asocediendo o si nun querían dase cuenta por que yera más fácil echa-y la culpa a ella por ser diferente y pensar que nun quería formar parte del grupu. Paecióme una de les reflexiones más dures, por sentir el miéu, la soledá y la frustración de sentise sola y culpable n'una situación asina ensín alcontrar sofitu o ayuda verdadera.

Ye una llectura bien recomendable, magar de ser dura, que vos respigará pero na que vos enamorareis de una protagonista lluchadora, inocente y candial.