Alba Carballo ye una escritora d'Avilés (1995) Llincenciada en Filoloxía hispánica, y profe de lliteratura.
Escribe dende bien neña tanto en castellán como n'asturianu, cultivando dellos xéneros lliterarios, sicasí centrándose más nel rellatu y el microrellatu.
🏆Participó en dellos concursos lliterarios nos que algamó delles menciones y reconocimientos, como'l primer premiu del concursu "Que guapo ye querese" (Xixón,2018) o el primer premiu nel concursu "Ello yera una vegada" (Llaviana, 2019).
🏆Participó en dellos concursos lliterarios nos que algamó delles menciones y reconocimientos, como'l primer premiu del concursu "Que guapo ye querese" (Xixón,2018) o el primer premiu nel concursu "Ello yera una vegada" (Llaviana, 2019).
📚 Participó en publicaciones collectives como la revista de lliteratura Formientu, Fechu en cuarentena (Redagast, 2020) , microrrelatos 50/100 y en iniciatives como la dinamización de talleres d'escritura creativa, o la participación en Lletres femenín plural.
Güei vamos a face-y la entrevista rescamplu ⚡ pa conocela un poquitín más:
⚡1. Bones Alba, ¿Cómo lleves la cuarentena? ¿Yes del grupu que ta aprovechando'l tiempu pa lleer y escribir, o del que tamos faciéndolo menos de lo que nos prestaría?
Toi aprovechándola más pa estudiar que pa escribir por placer. Lo qu’escribo depende muncho del estáu d’ánimu que tenga. Agora mesmo, con esta situación, toi más pendiente de la información que cuerre del virus.
Toi aprovechándola más pa estudiar que pa escribir por placer. Lo qu’escribo depende muncho del estáu d’ánimu que tenga. Agora mesmo, con esta situación, toi más pendiente de la información que cuerre del virus.
⚡2.¿Qué xéneru te presta más pa escribir?
La novela, el rellatu y el microrrelatu
son les formes coles que más cómoda toi. Los fechos, los llugares,
los personaxes, el tiempu, la dómina… Tu decides cómo ye too, ye
una llibertá que me fai sentir perbién.
⚡3.¿Xéneru que más te presta lleer?
Los mesmos que me presta escribir. Toi
mui cómoda lleendo noveles, pero tamién llevo unos años averándome
al xéneru ensayísticu. Pa vivir na sociedá d’agora ye preciso
tener una mentalidá crítica y facer dobles llectures hasta de les
coses más básiques.
⚡4.¿Tienes dalgún vezu o zuna a la hora de ponete a escribir?
Anque paeza raro, cuando escribo nel
ordenador tengo de tener los márxenes de la fueya siempres iguales
(1,91 nos cuatro llaos) pa que tea equilibráu visualmente. Nel
papel, cuando faigo borradores o escribo delles idees pa una
historia, tien que ser con tinta negro.
⚡5.¿Qué zunes llectores mos puedes confesar?
En xeneral, nun soi a lleer
bestsellers. Nun ye que nun-yos dé una oportunidá, pero lo
normal ye que nun me llame l’atención esa lliteratura tan
comercial. Otru aspectu que llevo mal son les hestories (o la poesía)
amoroses qu’esparden un ideal del amor románticu. Una cosa ye
lleer (con perspectiva) un clásicu, pero otra ye siguir dientro
d’esa dinámica.
⚡6.El to escritor/a de cabecera (pueden ser varios):
Anque lu conozamos más como
articulista, préstame enforma Juan José Millás. Sicasí, mirando a
América Llatina, Eduardo Galeano ye ún de los mios referentes. Como
muyeres, Elena Quiroga y María Xosefa Canellada nun me falten na
biblioteca.
⚡7.¿Los tos llibros clásicos preferíos?
N’asturianu, Montesín (de
María Xosefa Canellada) ye, pa min, una obra de significáu
persespecial. Eso sí, tamién tán los villancicos del XVI y XVII,
que me paecen mui prestosos y creo que nun se-yos da la importancia
que merecen. N’otres llingües, los cuentos de El Conde Lucanor
y La letra escarlata (The Scarlet Letter), anque
sean de dómines mui diferentes, son obres que siempres recomiendo.
⚡8.¿Tas trabayando en dalgún llibru actualmente?
Sí, llevo trabayando
unos meses nuna novela qu’espero terminar en breve. Nun voi dicir
títulu, pero ta mui rellacionada col mundu marineru y la vida d’un
trabayador mui especial. D’otru llau, va un tiempo que quiero facer
una colección de microrrelatos, xuntando dalgunos que yá tengo
escritos con otros inéditos.
⚡9.¿Si tuvieres qu'escribir un llibru con otru escritor, a quién escoyeríes?
Ensin dulda fadría una tríada con
Laura Marcos y Juan José Millás, anque ta claro lo diferentes que
son los perfiles de dambos escritores ente ellos.
⚡10.Peor llibru que lleeras:
Dame un pocu de reparu dicir qu’un
llibru ye’l “peor” que lleí, porque respeto’l llabor de
cualquier autor. Pero el deber social y la necesidá de romper dellos
moldes y refugar conductes sexistes oblígame a sorrayar la saga 50
sombras de Grey.
⚡11.¿Tienes dalgún personaxe lliterariu preferíu?
Holden Caulfield, de El guardián
entre el centeno (The Catcher in the Rye, J.D. Salinger).
Ye una novela que marcó la mio adolescencia, y que podría relleer
durante tola vida. Holden significa munches coses pa min que nun ye
momento de detallar, pero nun tengo duldes al dicir que ye’l mio
personax favoritu de la historia de la Lliteratura universal.
⚡12.¿A qué escritor revivirías pa que pudiera siguir escribiendo?
Enriqueta González Rubín y Federico
García Lorca
⚡13.¿Escritor/a preferíu?
Nun pueo escoyer un únicu autor. Pueo
tener un autor preferíu de novela, de teatru, de poesía… Pero son
universos mui diferente pa escoyer d’esa forma.
⚡14.¿Un llibru col que llorasti?
A falta d’ún, voi dicir trés: Güelu
Ismail, d’Esther Prieto; Cactus, de Rodrigo Muñoz Avia
y El idiota de Dostoievsky.
⚡15.¿Cuála ye la to llectura actual?
¡De momentu, el temariu de les
oposiciones! Pero cuando pasen, tengo pendientes ensayos como
Asturploitation (Damián Barreiro, Premiu “Fuentes Acevedo”)
y Por qué amamos a los perros, nos comemos a los cerdos y nos
vestimos con las vacas (Melanie Joy).
⚡16.¿Un llibru que tengas munches ganes de lleer?
Prestaríame tener una traducción
billingüe del Corán. Gústame averame a les distintes
relixones pelos testos sagraos, anque sea dende una perspectiva atea,
y d’esti nun lleí más que dellos versículos (munchos, en
caligrames).
⚡17.¿Tapa dura o tapa blanda?
Dura pa tar en casa y blanda pa dir de
viax. Pero, si hai qu’escoyer, meyor dura.
⚡18.¿Llibros llargos o curtios?
Una novela o una colección de rellatos
préstenme llargos, pero en poesía prefiero llibros curtios. Pa min
la poesía ye como un pastel, demasiado pue llegar a cansar.
⚡19.¿Sagues o autoconclusivos?
En xeneral voi por llibros
autoconclusivos, pero hai sagues como la de Harry Potter que
me traen perbonos recuerdos.
⚡20.¿A quien te prestaría que-y ficiera esta entrevista rescamplu ⚡?
Tengo curiosidá por ver qué
respondería a too esto Pablo Texón.
⚡21. Y ya pa rematar, ¿ que llectura nos recomiendes pa esta cuarentena?
Téngolo claro: los Cuentos de ser
y de tar de Laura Marcos, un cuentín cada día pueden facer esta
cuarentena muncho más prestosa.
Milenta gracies Alba por participar na entrevista rescamplu, ye un placer lleete y averanos un poquitín más a los tos hábitos de llectura y creación! 💜
Y a vosotres/os llectores, espero que vos prestara, bien llueu tendreis máis entrevistes. Podeis dexar en comentarios a quien vos prestaría que-y ficiera la entrevista rescamplu ⚡⚡
Ningún comentario:
Publicar un comentario