Bones llectores!!
Güei vengo a falavos d'un llibru que rematé estos díes de lleer y que me prestó muncho, ye'l nuevu llibru de rellatos escritu por Inaciu Galán y asoleyau por Cuatro Gotes ediciones. Déxovos primero la sinopsis.
Sinopsis:
Tres recoyer la so obra poética en trés volúmenes, Inaciu Galán axunta agora en "Cartes nel horru (y delles hestories más)" los rellatos y microrrellatos qu'espublizó en revistes o colos qu'algamó premios nos últimos años, xunto a otros inéditos.
Nesti llibru recuéyense pieces narratives escrites en momentos mui distintos y con temes estremaos, que van dende'l terror al amor, pasando pel rellatu hestóricu y la recopilación d'hestories populares, teniendo en común la busca d'un elementu sorpresivu pal llector.
Opinión:
La verdá ye que nun suelo ser mui amiga de lleer llibros de rellatos d'un tirón, sinón que suelo intercalalos con otres llectures, sobre manera con noveles. Ya que camudar d'un rellatu a otru supónme un esfuerzu d'atención y de recrear personaxes, llugares y situaciones na mio cabeza, enforma grande. Sicasí, con esti llibru pasóme lo contrario y lleílu en 2 tardes. Voi cuntavos...
Esta publicación, d'unes 140 páxines, ta estremada en dos partes: la primera recueye rellatos y la segunda microrrellatos. Los rellatos son curtios, de non más de 2 o 3 carilles, y los microrrellatos de la segunda parte rara vegada superen la media carilla.
El llibru entama con un rellatu que ye´l que-y da nome a la obra, y que yo tomé como una especie d'introducción a lo que vien darréu. Dende eses primeres fueyes fasta les postreres, l'autor va dir llevándonos por diferentes testos, bien estremaos en temátiques pero con un elementu en común, el misteriu y los finales que nun son lo que paecen.
A min personalmente engabitóme y dexóme ablucada col segundu rellatu, que lleva por títulu "Salir a la escuridá". Esti rellatu, bastante duru y que de xuru que vos va dexar cavilgando, caltién el misteriu dende l'entamu, y polo menos yo, nun esperaba'l final. Pero pa min lo meyor nun ye lo que cuenta, si non lo que dexa de cuntar, o pelo menos lo que yo sentí y cavilgué cuando rematé de lleelo. Paezme una reflexón sobre'l machismu y el maltratu ablucante, y repito, nun solo polo que cuenta la hestoria, si non pola reflexón que dexa'l final y la senciella estrapolación a otres situaciones menos "heavys" que la que mos amuesa'l rellatu, na que vemos el control, manipulación y terror que sufren les víctimes del maltratu.
Esta temática podremos alcontrala tamién n'otros rellatos y microrrellatos, a lo llargo del llibru, y non solo eso, sinón que a lo llargo de tola publicación lleeremos testos con temátiques bien comprometides y que-y dan visibilidá a situaciones o colectivos que tovía anguaño nun gocien d'igualdá, como les persones ensín llar, colectivu al que-y dedica varios rellatos y fala de como la sociedá los inora continuamente, la homosexualidá, el femenismu, la soledá, la guerra, la emigración, l'amor pola tierra, la mina, l'ambiente marineru... Son temátiques estremaes pero con un componente social y reflexivu perinteresante.
Nel llibru tamién hai espaciu pal humor y la sorna, sobremanera na forma de cuntar, narrar y conducir dellos rellatos, y pa la "fantasía" o les lleendes. Esto vémoslo especialmente nun rellatu nomau "Camín ensoyau" y que mos cuenta la hestoria d'un grupu de moces y mozos que van facer el camín de Santiago y que se ven envueltos nuna serie d'acontecimientos, cuanto menos, raros y misteriosos. Sedrá tamién pola mio cercanía a Compostela, y por que me presten enforma les lleendes, qu'esti ye otru de los rellatos que más me prestaron del llibru.
Como vos dicía enantes, el trabayu na mina, el fin de la minería, y los rellatos sobre la guerra o la emigración, tan tamién bien presentes na publicación, y prestóme muncho qu'en dellos testos se centre na importancia, delles vegaes callada, de les muyeres a lo llargo de toes estes situaciones.
Ye una llectura que me sosprendió muncho, quiciabes porque hasta'l momentu solo lleera poemarios d'Inaciu, y de xeitu prexuiciosu, esperábame temátiques más rellacionaes cola cultura, cola tierra, colo inmaterial... que tamién me presta enforma, pero esi factor "sorpresa" que nun esperaba fixo que quedara namorada de munchos d'estos rellatos. Sobra dicir que vos encamiento a toles persones que me teis llendo a que merqueis el llibru (de momentu en formatu dixital), y que disfruteis de la llectura.
Gracies por lleeme, naguo que vos prestara la reseña, y cuntáime, vosotros lleistís esti llibru? que vos paeció?
Ningún comentario:
Publicar un comentario