El diario de Anne Frank - Novela gráfica

Puntuación: 4,5/5

Bones llectores!!

Güei tráigovos la reseña d'un llibru que me presta enforma, y que dalgunos igual nun lleísteis tovía. Ye la novela gráfica del diariu d'Anne Frank.

Déxovos equí la sinopsis y agora pasamos a la mio opinión d'esti llibru.

Sinopsis

Tres la invasión d'Holanda, la familia Frank escondióse de la Gestapo n'una bufarda oculta nel edificiu onde'l padre d'Anne tenía les sos oficines. Ellí permaneció recluyida dende xunu de 1942 hasta agostu de 1944, fecha en que los sos miembros fueron deteníos y unviaos a campos de concentración. Nesi llugar y nes más precaries condiciones, Anne, una neña de trece años, escribió'l so estremecedor Diariu: un testimoniu únicu sobro l'horror y la barbarie nazi, y sobro los sentimientos y esperiencies de la mesma Anne y los sos acompañantes.

El presente volume recueye esti estremecedor relatu bella y delicadamente pa entornalo a la novela gráfica. Nuna nueva oportunidá d'averase a una hestoria que yá forma parte de toos nós.

Opinión

Esti llibru lleílu dempués del orixinal, ya que me dexara ablucada la hestoria, y tuví la necesidá de seguir lleendo, viendo documentales y afayando información sobre too lo asocedíu durante esos años y sobro'l horror que vivieron miles de families como la d'Anne.

Esta publicación ye una adaptación gráfica de la impactante hestoria de les 8 persones qu'ocupaben la "Casa de atrás" un escondite secretu n'Amsterdam, na empresa del pá de Anne, la protagonista y autora del diariu nel que cuenta les sos vivencies durante los casi 2 años que tuvieron confináos. El llibru ye fiel a la hestoria orixinal, y nun solo está fechu de viñetes al más puru estilu cómic, si non que tamién amesta testos de fragmentos íntegros del diariu orixinal de Anne, que los autores consideraron que teníen qu'apaecer nel llibru por ser partes fundamentales de la hestoria que debemos conocer tal y como Anne los escribió. 

Los momentos más duros del llibru estan adaptáos y anidiáos, polo que considero que ye perfeutu pa xente más mozo, que pueda averase a la hestoria y sufrimientu de la familia de Anne, que son namás un exemplu de les miles de familes que taben na so mesma situación, y facelo dun xeitu menos duru.

Yo personalmente, pa la xente adulto recomiéndolo como un complementu al diariu orixinal, que creo que toes y toos deberíemos lleer dalguna vegada na nuesa vida. O pa la xente a la que nun-y preste nada lleer, ya que ye un llibru cortín (160 páxines) y al ser novela gráfica lleese enforma rápido. 

Les ilustraciones, y la edición en xeneral son mui prestoses lo que fae que esfrutemos tovía más de la llectura, ya que son fieles a la dómina na que foi escrita y métente per bien na hestoria.

En resumen: ye una novela gráfica totalmente recomendable pa toles persones, tanto moces como adultes, que quieran averase a la hestoria d'esta familia, o que ya lleeran el diariu orixinal y quieran ver otro xeitu de descubrir la hestoria.