Marta Mori (1965, Xixón), ye una escritora asturiana llicenciada en lliteratura y doctora en filoloxía hispánica pola universidá d'Uviéu.
Foi la primera muyer en ganar el premiu Xuan María Acebal, que concede la Conseyería de Cultura y Turismu del Principáu, nel añu 2010, col so poemariu "La mio voz".
Nos año 2002 y 2004 algamó'l premiu Teodoro Cuesta de Poesía colos poemarios "Pórticu" y "El tiempu de la espera" , respectivamente.
Ente la so obra tamién destaquen llibros como L'alcordanza, La coleición de rellatos Histories familiares, La torna d'El cementariu marín, de Paul Valéry, o el so postreru poemariu asoleyao por Trabe nel 2019 Orfandá.
Güei vamos facé-y la entrevista rescamplu pa conocer un poquitín más los sos vezos y gustos llectores:
⚡ Bones Marta, ¿Cómo lleves la cuarentena? Yes del grupu qu’aprovechó la cuarentena pa lleer y escribir enforma, o de los que nun yeren quien de concetrase…?
Nel tiempu que llevamos de cuarentena, yá pasé per toles fases. Tuvi munchu trabayu, dellos díes presencial, asina que nun lo tuvi fácil pa escribir. De toes formes, como nun podía salir, púnxime a la xera. Tuvi momentos d’euforia y díes en que nun yera quien a concentrame, díes de serenidá y díes d’ansiedá. Esto ye mui llargo, da pa muncho.
⚡¿Qué xéneru te presta más pa escribir?
Nestos momentos, la poesía. Nun siempre foi asina.
⚡¿Xéneru que más te presta lleer?
Tamién la poesía, siguida de la prosa autobiográfica y últimamente, l’ensayu. De moza lleía muncha narrativa. La novela nun la disfruto como enantes, soi cada vez más esixente. Del cuentu, préstenme los microrrellatos, paezme que ye un xéneru que fuera d’esti campu, de los años ochenta p’acá quedó estancáu, pero nun ye lo que más lleo. El teatru, quiero más velu.
⚡¿Tienes dalgún vezu o zuna a la hora de ponete a escribir?
Gústame escribir nuna llibretina especial, a lo menos pa entamar el testu. Bebiendo té.
⚡¿Qué zunes llectores mos puedes confesar?
La más chocante, que me gusta lleer caminando. Sobre too con buen tiempu y n’espacios abiertos como paseos, carreterines pequeñes…
⚡¿El to escritor/a de cabecera? (pueden ser varios):
Si te refieres a escritores a los que vuelves de cuando en vez, van cambiando según les époques (tengo bastantes años): per orde cronolóxicu, dende los 12 o 13 años, Antonio Machado, Pablo Neruda, Gabriel García Márquez, Simone de Beauvoir, Camus, Quevedo, Mercè Rodoreda, García Lorca, Cortázar, Borges, Margerite Yourcenar, Safo, Catulo, Virginia Woolf, Berta Piñán, Xuan Bello, Alejo Carpentier, Rosalía de Castro, Dostoievski, San Juan de la Cruz, Beaudelaire, Rimbaud, Italo Calvino, Unamuno, Salvador Espriù, Doris Lessing, Javier Marías, Emily Dickinson, Olvido García Valdés, John Berger, Anna Aimatova, Xandru Fernández, Margaret Atwood, Joan Margarit, Carrere… Nun m’alcuerdo de tol mundu…
⚡¿El to llibru clásicu preferíu (pueden ser varios)?
Si encontrara una antoloxía de poesía medieval, renacentista y barroca europea, con autores como Rutebeuf, Dante, Petrarca, Garcilaso, Ariosto, Shakespeare, Quevedo, Sor Juana Inés… diba ser el mio llibru clásicu preferíu.
⚡¿Tas trabayando en dalgún llibru/escribiendo daqué actualmente?
Taba trabayando nun ensayu hasta qu’empezó l’enzarru y a la vez escribiendo poesía, aparte los estudios lliterarios. Sigo cola poesía y col artículu.
⚡¿Si tuvieres qu’escribir un llibru con otra persona, a quién escoyeríes?
A Berta Piñán. Una vez ofrecióme traducir a medies del italianu y daquella nun podía. Arrepentíme muncho, diba aprender un montón.
⚡¿Un llibru que nun fueras quien de rematar?
El Ulysses de Joyce.
⚡¿Tienes dalgún personaxe lliterariu preferíu?
La Regenta provócame muncha tenrura.
⚡¿A qué escritor revivirías pa que pudiera siguir escribiendo?
A Luis Sepúlveda.
⚡¿Un llibru col que llorasti?
Joana de Joan Margarit.
⚡¿El llibru que más te marcó y que-y recomendaríes a tol mundu?
Nun hai un llibru únicu. Impresionóme muncho la novela Cien años de soledad cuando la lleí pela primer vez, a los trece años, y el Quijote, cuando lu lleí nel Institutu.
⚡¿Cuála ye la to llectura actual?
Toi relleendo Un palaciu enllenu d’ortigues de Pablo Antón Marín Estrada.
⚡¿Un llibru que tengas munches ganes de lleer?
La cuarta parte de la serie La mio llucha de Karl Ove Knausgard. Nun sé por qué va pasando’l tiempu y nun me pongo.
⚡¿Tapa dura o tapa blanda?
Nos clásicos, tapa dura. Nel restu, tapa blanda pa llevar en bolsu.
⚡¿Llibros llargos o curtios?
Llibros llargos mui buenos.
⚡¿Sagues o autoconclusivos?
Disfruto de les dos coses.
⚡Tienes curiosidá por saber que respondería nesta entrevista: Julio Cortázar.
⚡Y ya pa rematar,
¿Qué llectura nos recomiendes?
L’adversariu d’Emmanuel Carrère.
Milenta gracies Marta por participar n'esta entrevista rescamplu, y por dexar que nos averemos a los tos gustos, vezos y zunes llectores. 💜
Ningún comentario:
Publicar un comentario