Sentaes baxo la
solombra d'un vieyu carbayu, detrás d'esta particular casa ya ensin
vida, imaxinábemos como sería el nuesu futuru. Tú, una tienra moza
de güeyos prietos y piel del color
de la lleche, que contrasta col mio cuerpu escuru color café, y
que crea un guapu tapiz de colores cuando nos abrazamos. Yo, una
xoven con ganes de comer el mundiu y derribar toles
muries que alcontráramos al nuesu pasu.
Escapábemos de les
miraes observadores, acusadores, y abellugábemonos nel nuesu paraísu
particular. Demientres acolumbrábemos el paisaxe del ampliu valle
que teníamos delantre de nós, fantasíabemos milenta tardes con
vivir, nun futuru, nesa casa que cada día víemos
delantre nueso, ya feble, ensin vida, escaecida, pero que pa
nós yera el llugar mas máxicu del mundu, el nuesu
abellugu, cómpliz de los nuesos besos y afalagos robaos.
Los años pasen, y
too camuda. Esta vida ya nun ye la collacia qu'imaxinábemos, pero
daqué permanez dempués de too, siguimos xuntes.
La vida fíxonos
tener que colar del nuesu llar,
del pequeñu pueblu nel que vivíemos, y buscar un futuru “meyor”
na ciudá, onde esperábemos alcontrar una situación llaboral digna,
y sobre manera volvenos invisibles, escapar de los murmurios
costantes y los xuicios innecesarios. Pero non too ye como parez, y
nada ye tan fácil. Los prexuizos, los estereotipos, la falta de
sensibilidá y la falta de respeutu tan en toes partes, al igual que
la precariedá llaboral y la falta de salíes.
Too se torna
difícil, esi nun yera'l abellugu qu'esperábemos alcontrar cuando
colamos. Volvímonos invisibles, pero solamente pa la falta de
solidará y empatía. Entamamos a echar de menos la unidá del nuesu
pueblu, la mirada observadora de la vecina que vixila tras la ventana
si dimos o venimos, pero que se preocupa el día nel qu'el pan ta
demasies hores colgau nel gabitu de la puerta, esperando a que que lo
recoyamos, ya interésase por si tamos bien o si pasó daqué; Esa
vecina que trae una docena de güevos y un sacu patates cuando les
coses tan difíciles, o la que s'ufre a cuidar a mio güela cuando
tenemos que colar de casa por dalgún motivu.
Tornamos al pueblu,
pa sorpresa de tol mundu, ¿Alcuérdeste
de la cara de mios pás al venos apaecer de nuevu coles maletes?
Nunca nun la escaeceré, pero tovía menos la cara d'allegría de la
señora Carmen al enterase de que quedábemos en pueblu, nunca nun lo
imaxináremos, siempres foi
tan distante con nós.
Tornamos coles piles
cargaes, cola cabeza enllena de reflexiones... descubrimos qu'el mieu
ta dientru de nós mesmas, que somos enforma fuertes pa ignorar
cualesquier tipu de comentariu, que nos amamos y que queremos vivir
nel pueblu que nos vio crecer, coles nueses families.
Dexamos
d'escondenos, y fuímos a
vivir xuntes, a casa de los tos pás. Tornamos mentalmente a la
infancia, y a l'adolescencia, a los paseos pela aldea, pela viesca,
pela oriella del ríu, y sobre too a sentanos al pié d'aquel vieyu
carbayu y observar lo que queda de la casa de los nuesos suaños, de
la nuesa fantasía xuvenil, que cada vez tien menos vida y piérdese
nel mar del escaezu; La vexetación entama a tapar les parees, y la
naturaleza quier recuperar lo que yera d'ella...
Agora, cuasi 30 años
dempués, voi cuntate una de les noticies más importantes de la
nuesa adolescencia, por que tornamos a ella n'esti mesmu minutu:
Eduardo víendenos la casa! Si, si... la casa de los nuesos suaños,
el nuesu abellugu en ruines, pero que sedrá el meyor llar del
mundiu, gracias a la to fuercia que lo inunda too.
Ya ta apalabrada,
too está listo pa entamar a trabayar n'ella, solamente faltaba ser
quien de cuntátelo y por eso t'escribo esta carta, sentada baxo'l
nuesu árbol, na que ya ye la nuesa casa. Magar que falo tolos díes
contigo, nel cuartu, na cocina, nel trabayu... esta noticia merecía
quedar escitra per y pa siempre. Como'l nuesu amor. Esti será'l
nuesu llar, magar que tú nunca llegues a pisalo, pero tarás nel
tolos díes al mio llau, en cada centímetru. Nun sabes la falta que
me faes, y lo muncho que t'echo en falta.
Quíérote Xulia.
Torna al asturianu, del rellatu ganador del I concursu de rellatu románticu d'Hechizo Editorial.
Testu y torna: Eva Cameán Pensado.
Ningún comentario:
Publicar un comentario