📚 Aish... les hermanes Brontë... Lo que más me presta de cualquiera de los sos llibros ye que siempres me faen volver al mesmu llugar. Nel imaxinariu de la mió cabeza tan yá dibuxaos los páramos, les cases victorianes, los xardines floríos..., polo que con cualquiera de les noveles que lleo de Emily, Charlotte o Anne vuelvo ehí una y otra vez.
💚 Les persones que me conceis sabéis que Cumbres Borrascosas (de Emily Brontë) ye'l mió clásicu favoritu del universu, y que dempués de lleelu entamé a querer saber más de les hermanes y lleí otres obres d'elles (Agnes Grey, Jane Eyre, poemes, biografíes y noveles gráfiques sobre les sos vides etc), y tanto la mió compañera @lafarmacialiteraria como yo, teníemos munches ganes de lleer La Inquilina de Wildfell Hall y sacános la espinina que teníemos cola menor de les hermanes, al ser Agnes Grey la obra que menos nos gustara d'elles y decepcionáranos enforma.
💜 Lo ciertu ye que comimos les 600 y pico páxines del llibru en menos d'una selmana, y que nos engabitó dende los primeros capítulos. Tamos ante una novela feminista, escrita nuna dómina na que les muyeres taben na solombra y na qu'esti términu nun existía. Una novela valiente y con una crítica social brutal. Alcoholismu, machismu, relaciones tóxiques, maltratu físicu y psicolóxicu... temes de los que yera tan difícil falar y sobremanera escribir nesa dómina y que demuestren una valentía total por parte de l'autora.
Eso si, nes noveles de Anne, a diferencia de les de les sos hermanes, tan cargaes de referencies a pasaxes bíblicos y dáse-y una fondera importancia a la relixión, cosa que nun me presta y que nun pasa d'esa manera nin en Jane Eyre y munchu menos en Cumbres Borrascosas.
De toes maneres ye una novela que me fascinó y que vos recomiendo a toes!!!
Ningún comentario:
Publicar un comentario