📚 Los incomprendidos, de Pedro Simón, foi la nuesa última llectura nos Aquelarres Lliterarios de la llibrería. Un llibru que fala d'adolescencia, del pasu del tiempu y de la vida, y sobremanera, como diz el título, de incomprensión.
🖊️ Al traviés de les voces de Javier y de Inés (padre y fía), vamos conociendo la hestoria familiar, de los momentos que los ficieron tar más cerca, y de los que los separtaron, de como la vida pega y duel, ensín remediu.
😢 El llibru foi quien d'emocioname en delles ocasiones, y de tresportame a l'adolescencia y a sentime un poquitín más cerca d'eses edaes, habitualmente enllenes de complexos, de incomprensión, d'hormones revolucionaes, de facésete bola la vida y de que paezca que hai coses que namás te pasen a ti y que naide puede entendeles. De como hai vides, ehí fuera, que nun son sencielles, y como les firíes emocionales te pueden acompañar tola vida.
💜Un llibru marabillosu, que me prestó enforma, magar que'l final (como viene siendo habitual nes mios últimes llectures), nun me prestó. Non porque prefiriera que la hestoria acabara d'una manera o d'otra. Si non por que me paez que la reflexión final del libru nun debiera dir por esí camín. Dempués de demostranos que la vida ye dura, y que'n toes les families pasen coses dures, nun me paez que'l final "flowerpower" que'l autor escribió seya mui coherente col restu del llibru, y sobre too, cola realidad y la vida mesma.
📌 Facía tiempu que nun gastaba tantos marcadores 😂 Pero ye que tien frases, fragmentos y paxines enteres que son auténtiques ayalgues.
Ningún comentario:
Publicar un comentario