El paxarín mancáu - Reseña

El paxarín mancáu ye un llibru espublizáu pola Academia de la Llingua Asturiana nel añu 1990 , ya incluyíu na colección Escolín , na estaya de llectura llápiz mariellu: dende los 4 años.

Esti cuentu foi adaptáu y tornáu al asturianu pol grupu “El Carbayu”, ún de los Seminarios de Llingua Asturiana que funcionaba nel Centru de profesores del Nalón.

Amás de la torna y l’adaptación del cuentu, tamién ficieron programaciones de xeres didáctiques pa trabayar los conteníos del llibru. (Incluyíes nel llibru).

Les ilustraciones fueron feches por Honorina Pascual, una de les componentes del grupu “El Carbayu”. Lluéu grabáronse tamién los testos con escolines/os del colexu “Nuestra Señora del Rosario” de Sama (Llangréu).

El cuentu trata dun paxarín, que cuando finaba la seronda y tolos páxaros emigraben p’África, él nun podía colar yá que nun yera quien a esnalar por que tenía un ala mancada.

Entós decidió averáse a la viesca p’alcontrar un abellugu nel que poder pasar l’iviernu.

Entamó a entrugá-y a los árboles que diba alcontrando, si-y dexaben pasar l’iviernu ente les sos cañes. Primero entrugó-y al abedugu, dempués al umeru, más tarde al carbayu, y toos ellos contestáron-y que non.

El probe paxarín desesperáu siguió blincando p’alcontrar un abellugu, hasta que lu vió un xardón. El xardón, ufiertó-y abellugáse nes sos cañes, y un texu que nun taba llueñe díxo-y que lo curiaríe del aire xelao.

Asina qu’el paxarín fizo un nial bien guarecíu ente les cañes del xardón y el texu curiábalu del airón. La encina que tamién quería ayudalo ufiertó-y los sos frutos pa alimentase.

Un día el vientu’l norte entrugó-y a so pá, el rei de los vientos, si podía baxar a la viesca xugar colos árboles. So pá retrucó-y que podía pero cola condición de non estorbar a los árboles qu’ayudaren al paxarín mancáu.

Asina, un día el vientu’l norte baxó a la viesca y entamó a soplar penriba les cañes hasta que tiró toles fueyes de los árboles que nun ayudaren al paxarín mancáu. Y dende entós, tolos años, na seronda, pasa lo mesmo na viesca.

Ye una hestoria bien guapa pa falar sobre les estaciones, la seronda, les especies d’árboles de fueya perenne y fueya caduca etc

Ye amás un exemplu sobre la solidaridá, l’amistá y l’arrogancia.

Hai que dicir, que’l llibru tien dalgunes faltes ortográfiques , por cuenta de que tien casi 30 años. Consta de 36 páxines, de les cuales 17 son de cuentu, ya el restu son de xeres, oxetivos del llibru etc. El testu ta escrito en lletra redondilla, amestada, negrina y cursiva. Polo que nun facilita la llectura , pero ye legible. Les ilustraciones tan fechas a mano, son bastante sencielles y la edición bastante básica, hai que recordar otra vegada que tien casi 30 años, pero la hestoria ye tan guapa que suple toos esos defectos.