Suca y L'Osu. El llibru la Viesca II. Reseña.

Güei tráigovos esti álbum ilustráu nomáu "Suca y L'Osu" editao pola editorial "Pintar Pintar" , incluyíu na so colección "Llibros pa imaxinar". Esta editorial entamó con esta colección como rempuesta a la difícil situación pola que ta pasando l'asturianu y la so lliteratura. Editando llibros n'asturianu a un preciu baxu, pero de muncha calidá, faciéndolos accesibles a tol mundu.



Dientro d'esta colección atopamos esti llibru, que ye la segunda parte d'un proyeutu de colección de llibros infantiles escritos en castellán nomau, El Llibru la Viesca (En castellán EL libro del Bosque), que la desapaecida editorial madrileña Orión entamó nos años 40. El primer llibru ye "El tiu Tanón, La Tía Tana y la hestoria de Tanín", del que vos falé fai unes selmanes, dambos textos escritos por María Josefa Canellada , Sicasí, la colección paecía tener continuación pero nin la familia de l'autora nin la editorial pudieron recuperar nengún títulu más, nin saber si salieron a la lluz o quedaron perdíos na solombra d'aquellos años.
La presente edición, ta ilustrada por Sandra de la Prada, y la torna al asturianu fecha por Mar Martín. Ye una edición perguapa y cuidada, en tapa dura y con unes ilustraciones a páxina completa y a tou collor.
Nesti llibru hai dellos protagonistes principales, magar qu'el títulu fala de Suca (la raposa), y del Osu (Zurro), realmente los verdaderos protagonistes son ,de nuevu como nel llibru anterior, la Tía Tana y el Tíu Tanón, que son el exe vertebrador del cuentu.
La hestoria entama falando de Suca, la raposa, y de les coses que va deprendiendo, como a golifar, a cazar pa alimentase... Y darreu ya entren na hestoria el Tiu Tanón y la Tía Tana. Los dos trabayen de siguíu, Tanón nel campu, y Tana en casa,faciendo los llabores, curiando la quiríca... esta última ye perimportante pa Tana, ya que-y apurre alimentu nuna dómina na qu'esti nun sobraba.
Un día, el tíu Tanón taba traballando nel campu, col so güé, y l'osu averose y díxo-y a Tanón que quería come-y l'animal. Tanón pidió-y que porfavor dexara al güé acabar el trabayu. Y L'osu aceptó y tirose embaxo una castañal esperar y echar un pigazu a que Tanón y el so güe acabaran d'arar.
Suca propúnxo-y a Tanón que-y echaría un gabitu col tema del güe, a cambio que-y dexara comer a la quirica y a los sos pitinos. Tanón desesperáu, aceptó y acabaron col Osu.
Cuando llegó a casa, contólu a Tana, esta dixo que nun podíen dexar a la raposa comer a la so quirica, entós diéron-y a Suca un sacu, nel que-y metieron un perru y a los sos cachorros, estos escorrieron a Suca bien lloñe, y la raposina echóse a descansar nun abellugu.
Equí termina la hestoria.
 El llibru ye muy guapu, quiciabes encamentáu pa primeros llectores autónomos, ya que los más pequeños pue que nun entiendan la hestoria y-yos de mieu que la raposa mate a los paxarinos cuando entama'l cuentu, cuando matan al osu etc. Hai que tener en cuenta tamién la dómina na que foi escritu'l testu orixinal pa entender el contestu de munches situaciones como'l papel de la muyer na hestoria, la relación colos animales etc
Déxovos unes semeyes del interior del llibru.
Gracies por lleer y compartir con quien pienses que-y puede prestar.