Esti fin de selmana, unes collacies que viven en Porto, fixéronme un regalu perprestosu, col que nun contaba, y que me finxo muncha ilusión.
Regaláronme esta edición, en Portugués, del fantásticu llibro del Home que plantaba árboles, del que yo tenía la edición Pop-up en castellán "El Hombre que plantaba árboles" de la editorial Duomo.
Ye un llibro bien especial. Esta edición de la que voi falavos, espublizada por "Cultura Editora" ye bien prestosa, el testu orixinal ye de Jean Giono , y ta tornau al portugués por Hugo Gonçalves, les ilustraciones ya el diseño cuerren a cargu de "We Blog You".
Ye un llibru básicu y que toes tendríamos que lleer, una llección de solidaridá, arrogancia, y amor pola naturaleza.
La hestoria fala dun mozu que nel añu 1913 traviesa los Alpes ensín compañía dalguna, buscando paz, tranquilidá y naturaleza, lloñe de la ciudá. De sópitu alcuéntrase con una realidá abondu distinta de la qu'esperaba, dase de focicu con un paisaxe desérticu, maltratáu pol home. Dempués de dellos díes caminando, ensín agua, alcuéntrase con un vieyu pastor, nomao Elzéard Bouffer, y la so reciella. El pastor ye un paisanu con un calter ariscu y pocu falador. Pero ayuda'l mozu dando-y agua, comida y abellugu. Y aunque nun fala apenes, fai saber al mozu que nun-y fai mal la so compañía. Na aldea onde vive Elzéard toos los vecinos anden siempre engardíos , llévense mal unos colos otros, peléanse pol agua, pola comida... Y les condiciones climátiques non ayuden muncho, un airón seco y duru que fai alloriar a cualesquier. Too esto deriváu de la estroza que los homes ficieron na viesca y na naturaleza en xeneral que fai que la xente que vive ellí tea nunes condiciones muy dures.
El pastor confiésa-y al mozu cual ye la so misión na vida: Plantar cientos d'arboles pa poder recuperar y caltener la viesca autóctono. Nun territoriu aparentemente perdío pa siempre.
El mozu acompaña'l vieyu na so llabor durante unos dies, hasta que tien que colar. Parez que'l trabayu del pastor ye una llocura y que sedrá imposible camudar la situación.
A lo llargo de décades, el mozu torna visitar al vieyu con regularidá, siendo quien a percibir como la solidaridá, l'enfotu y l'arrogancia del paisanu, (dun solu paisanu), pue camudar una situación que paecía perdía.
Cuando'l mozu vuelve por última vez a visitar al pastor, esti últimu tenía ya 87 años. Tou camudara nel pueblu, ellí vivía más xente qu'antes , nun teníen tantos problemes ente ellos, l'aire yera cálidu y prestosu, y de les montañes llegaba un rumor como d'agua. Yera'l ruiu del vientu na viesca. Lo que más emocionó al mozu foi oyer el ruiu del agua nun estanque, y ver como plantaren una tilal , que tendría yá unos 4 años, y yera'l símbolu incontestable de la resurreción del llugar. Esta foi la última vez que vió a Elzéard. Tornó 8 años dempués desa última visita, y tol valle taba rexenerao, la viesca frondosa, les praeres plantaes de cereal, la xente viviendo'n pueblu... Y too esto, gracies al enfotu y la solidaridá d'un solo home, que fizo resurdir un país , dun desiertu.
Ye un llibru guapísimu, imprescindible, una llectura pa moces y pa adultos, que afonda nunos valores esenciales sobre'l respetu y l'amor pola naturaleza.
Foi un regalu bien prestosu, que m'emocionó enforma.
Gracies collacios, fonderamente agradecida. 💚🤗
Espero que vos preste la entrada, y que los que non conoceis esti llibru non tardeis en lleelo.
Ningún comentario:
Publicar un comentario