Telva y el fueu - reseña

Telva y el Fueu ye un cuentu espublizao pola editorial Trabe, nel añu 98, escrito por Miguel Rojo y que ta dientro de la colección "Montesín redrueyu" .
A pesar de ser un llibru que ya tien unos años, y que la edición, quiciabes pa dalgunos, nun sía tan espectacular como la d'otros llibros editaos nos caberos años, ye una hestoria bien guapa y con dellos valores detrás pa trabayar cola reciella.



La hestoria socede nun pueblu nomao Vil.lar, un pueblín que ta en fiestes, y que paez tar abandonáu por que tola xente tá de folixa de nueche, y pol día nun hai naide nes cais.
Telva, la protagonista del cuentu, ye una neña gayaspera y llista, que vivió tola vida en Vil.lar. Poles fiestes, los sos primos que viven na ciudá, vinieron pasar unos díes a so casa. Telva, que-y presta pola vida pasear, tar en monte y la naturaleza... Pide-y a sos pás permisu pa llevar a los sos primos a dar un paseu pola viesca hasta la fonte'l cuélebre.
Pol camín Telva dase cuenta de que los sos primos nun tienen conocencies sobre la viesca, sobre la naturaleza, los animales, les plantes... por vivir na ciudá, y ella intenta enseña-yos delles coses sobre los árboles, los páxaros, la mitoloxía típica d'Asturies (El Cuélebre, La xana...) Polo qu'estos conteníos dannos pie a trabayar estes temátiques colos neños, y a averalos a la mitolóxia, la fauna, la flora etc.
Uno de los primos de Telva, mételos nun lio, prendiendo fueu sin querer na viesca, toos llogren escapar menos Telva y el so primín pequeñu, Lolín, a estos dos acaba por rescatalos el cuélebre, que muy engrifau fai-yos prometer que a cambiu de ayudalos, ellos tendrán que iguar el monte, repoblando, llimpiándo y curiándolo.
Polo que la temática de les quemes forestales, tan actual y esmolecedora, refléxase tamién nel llibru. Esto sírvenos para sensibilizar a la reciella, dende bien ceo, con esta problemática, ya intentar que les futures xeneraciones camuden les conductes y tengan cierta sensibilidá coles problemátiques ambientales qu'afecten a Asturies.
Un llibru perguapu, de fácil llectura, que puede trabayase dende bien neños, ya ideal para primeros llectores. Con lletra grande, ya ilustraciones a color en toes les páxines.