"La Liebre que se Burló de Nosotros" de Andrea Camilleri

PUNTUACIÓN: 4/5

SINOPSIS:

Si realmente un día fuéramos quién a saber que opinión tienen de nós  los animales toi seguro de que nun nos quedará más remediu que sumir del planeta, enllenos de vergoña. Yo, por suerte, ya nun voi tar. Pero prestaríame que dalgún bisnieto mío apurriera a los animales un exemplar d'esti llibrín  pa que pudieren tener de mi, y de munchos como yo, una opinión, y que fuera llixeramente distinta"
OPINIÓN:

Güei vengo falavos desti llibru de Andrea Camilleri, asoleyao por Duomo Ediciones, nuna edición perguapa en tapes dures y con un acabao suavín que presta muncho.
El llibru ye sobre too infantil-xuvenil pero como bien diz l'autor, ye pa too aquel que-y presten los animales, los cuentos curtios y les hestories con valores y reflexiones.
 El llibru ta compuestu por dellos relatos curtios, y en toos ellos fálasenos de diferentes anécdotes con animales, colas que seguro que toos nos sentimos identificaos con dalguna, son hestories realistes, que asoceden a diariu na vida de les persones.
Nun ye un llibru típicu de fábules o d'hestories fantástiques que traten de danos llecciones morales o enseñances con doble sentíu utilizando y personificando los animales  pa facelo, si non  que ye un llibru de relatos   realistes, nos cualos los protagonistes son animales, y toos ellos dan llugar a reflexiones, pero al rodiu de situaciones que los animales viven realmente por culpa de les persones. (Caza, animales domésticos, animales en pisos etc).

Cada relatu ye diferente, pero en munchos dellos caltiense l'humor y la sorna pa presentanos situaciones que puen paecer surrealistes pero que por desgracia na vida real nun lo son.

Ye un llibru bien amenu, de fácil llectura, prestosu, llixeru, pero que caltién muncho significáu y munches enseñances per detrás.

Yo recomendaríalo sobre to para neñes y neños a partir de 8 o 9 años, pero tamién pa les persones adultes que vos preste una llectura llixera pa coyer en cualesquier momentu, y vos apeteza somorguiavos na mente de los animales.