PUNTUACIÓN: 4,75/5
Esti pequeñu llibru basáu n'una conferencia TEDx de la escritora y comunicadora nixeriana Chimamanda Ngozi Adiche ye una auténtica ayalga para empecipiase y esclariar los conceutos básicos del feminismu.
Ye una llectura áxil y amena, d'unes 50 páxines (nun llibru de muy pequeñu formatu) que nos amuesa los estereotipos y prexuicios más claros y abondosos sobro'l feminismu y sobro'l papel de la muyer. Esto faceilo al traviés de vivencies y anécdotes vivíes en primer persona o que tuvieron llugar en dellos sitios nos que vivió (Nixeria, Estaos Xuníos...) Y que munchos d'ellos podríen ser extrapolables a cualquier llugar de mundu.
OPINIÓN:
Nel llibru hai partes, frases, fragmentos, que resumen per bien y en poques palabres el sentimientu o pensamientos de munches de nós. Por destacar dalgunu, encántame como ruempe barreres col estereotipu de la palabra "feminista" añediendo cada vez más acepciones a la so descripción. Entama definiéndose como feminista y a midida que-y van comentando prexuicios sobro esa palabra ella va rompiendolos hasta definise como "Feminista feliz africana que nun odia a los homes y que-y gusta llevar los llabios pintaos y tacones altos pa si mesma y non pa los homes".
Creo que ye una llectura bien necesaria, pa homes y muyeres, y sobremanera pa nuestrxs moces y mozos.
Tien torna a delles llingües, la mia ye una edición de Rinoceronte en galego, pero tamién teneis torna al castellán asoleyada por la editorial Random House.
Bien recomendable ensin dulda.
Ningún comentario:
Publicar un comentario