"Dos historias para no dormir" de Stephen king

Puntuación 4/5

Bones llectores!!!

Güei tráigovos la reseña d'un llibrín curtiu que pa nada ye'l estilu de llectures que suelo facer, por que si... danme muncha medrana!!

L'otru día vilu mientres ordenaba la llibrería, como ye curtiu y tenía munha curiosidá por lleer a Stephen King, por que ye unu de los escritores preferíos de mio pá, decidíme a garralo y lleelu.

Déxovos la sinopsis y cuéntovos.

Sinopsis

Un grupu de mozos y moces salen a navegar n'una balsa sobro un pacíficu llagu, onde una escura mancha mofosa los acosa; na cárcel, un internu tien estrañes velees nes qu'apaez una muyer que lu atrai y repele al empar, porque se convierte nuna inmensa rata.

Opinión

Bono como veis na sinopsis y nel títulu, n'esti llibrín alcontrámonos con 2 hestories: La Balsa y Nona. Son dos hestories inédites, bien estremaes en conteníu y forma, pero que les dos algamen trespasar los llímites de la realidá y de lo fantástico. Averándonos a unes situaciones imposibles d'imaxinar y para nada realistes pero a la par tan cotidianes y averaes a la nuesa vida que son quien de xenerar angustia y medrana mientres les llees.

Para min la meyor foi la primera hestoria, la de la balsa, engabitóme dende'l entamu y necesites avanzar pa saber que ye lo que-y asocede a la pandilla de moces y mozos y como remata la hestoria. Sicasí, la segunda hestoria "Nona" fízoseme un pizcu mas llenta, ya que'l protagonista cuéntanos al traviés del so puñu y lletra, dende la cárcel, la hestoria de como y por que acabó tando encerráu pero tamién entemez fragmentos de la so vida pasada, de la so infancia y que, igual ye verdá que  si que sirven pa conocer meyor la so personalidá y la raíz de les sos medranes ya inseguridáes, pero a min sacábanme de la hestoria completamente, del misteriu y de la intriga, faciéndoseme llentes enforma. 

Pasóme tamién daqué llamador con esti llibru, y ye que toos los personaxes paeciéronme "abofeteables" , menos 1, y muerre 😅 El restu dan ganes de tiralos a la mancha esa malina y que dexen de abrir la boca d'una vegada. Enxamás me pasara con nengún llibru. 

De les hestories nun puedo cuntavos más por que son enforma curties, el llibru tien unes 120 páxines en total, polo que cada hestoria ye mui cortina y culquier comentariu a mayores pué ser un spoiler. Polo que lo postrero que quiero dicivos ye que si sois fans de King de xuru que va prestávos por que son dos hestories pa lleer nun ratín que tengais llibre y son mui prestoses. Y si quereis, como yo, entamar a conocer la so obra y la so manera d'escribir, son afayadices por que son curties y sírvente pa facete una idea de lo que t'espera si garras un llibru del de 1000 paxines 😋 Yo creo que tengo demasiada medrana como pa atreveme a muncho más... 

Y a vostres/os que vos paez? Lleístes esti llibru, préstanvos les noveles de Stephen King?

Deixáinme en comentarios la vuesa opinión.

Un besín 😚