"Diamantes y otros demonios" de Miguel Sandín

 

Puntuación 4/5

Bones llectores, y felíz día del llibru!

Güei tráigovos la reseña d'esti llibrín, que ye una collaboración con Cuadernos del laberinto y Babelio, y que amás ye la mió postrera llectura, entamela ayeri y nun par de hores rematela.

 Voi dexavos primero la sinopsis y dempués cúentovos la mio opinión:

Sinopsis:

Fíu d'un importante políticu, Mario Castejón torna a Madrid dempués de pasar los siete postreros años n'una cárcel de Johannesburgo, a la que foi condergáu por intentar salir del país con un contrabandu de diamantes.

Nos dos mil seiscientos sesenta y siete díes que duró'l so cautiverio, Mario dedicó munches hores a buscar la forma de resolver dos asuntos pendientes enantes de refaer la so vida. El primeru ye recuperar a Paula, la muyer cola que vivía y l'única a la qu'amó. El problema ye qu'agora ella tien otra pareya. El segundu ye vengase del home que-y propunxo'l negociu, un tipu con un pasáu nada tranquilizador.

Nun van ser dos empreses sencielles, pero a la obstinación de Mario añede'l fechu de qu'esos años na cárcel enseñáron-y a perder el mieu.

Intriga, pasión, jazz y la ciudá de Madrid son les exes d'esti emocionante thriller pobláu de ritmu ya intensidá.

Opinión:

La verdá que garré esta novela nes manes ensín munches ganes, ya que durante la cuarentena nun soi quien a concentrame y cúestame la vida lleer. Como yera una collaboración que tenía qu'entregar enantes del día 8 dixi, voi echá-y un güeyu a ver que pinta tien y entamé a lleer les primeres páxines. Descubrí una llectura peramena, áxil, y que me engabitó dende'l primer capítulu, y que ya nun solté hasta acabala.

La verdá ye que nun ye una gran novela de misterio, tampoco una gran novela d'amor, nin un ablucante thriller, pero si un amiestu de too ello. 

Nun ye una novela que te camude la vida al lleela, pero si una novela entretenida, con unos personaxes que llegues a conocer y comprender y que te faen cavilgar de xemes en cuando.

Mario, el personaxe principial, ye'l que más discutíniu me xeneró. Delles vegaes fuí quien a comprendelo, a compadeceme d'él y naguar por que la vida-y sonrriera, pero según avancé na hestoria y na llectura, sobre manera al final, paecíome un personaxe esquiciáu y con unos comportamientos abusivos, tóxicos y acosadores que nun me prestaron nada, non por que se comportara asina, si non por que acaben aceptándose na hestoria y nun se cuestionen en nengún momentu. 

Si el llector o llectora son capaces de velos y de cuestionalos nun hai nengún problema, pero si la llectora y llector tienden a esti tipu de comportamientos tóxicos nes rellaciones, nun creo que seya una llectura qu'ayude, si non que fai la llabor contraria, perpetuar estos comportamientos. Ye por eso que tengo tantes duldes con ella.

Per un lláu como digo, ye una novela entretenida, pero creo que hai ciertos comportamientos que nun se pueden pasar por altu nin trivializar con ellos, y esto ye lo que baxo'l mio puntu de vista asocede n'esta novela.

Recomendaría esta llectura? pues si ye a una persona que confío en que ye quien a cuestionar y condergar estos comportamientos si... ye una llectura interesante, áxil, con misterio y con unos personaxes bien consiguíos. Pero si pola contra puede lleela daquién que apruebe estos comportamientos, para nada la recomendaría. Nun podemos permitir perpetuar les hestories d'amor enllenas de posesión, obsesión y acosu. Magar que esto lu vi nes últimes páxines, y que hasta'l momentu me taba prestando enforma, creo que tien muncha importancia y fíxome camudar la mio visión y valoración de la novela.