Ye'l presidente y unu de los fundadores de l'Asociación Ambiental Senda Nova, constituyida formalmente como asociación dende'l añu 2008, una entidá qu'entama actividaes y iniciatives rellacionaes col ecoloxismu y el patrimoniu cultural y social, fomentando actividaes como les rutes interpretatives, talleres ambientales, encuentros culturales, charras etc.
✊ Jose tuvo, y tovía anguañu ta, vinculáu a munchos movimientos y entidades culturales, sociales y ecoloxistes, y a diferentes lluches sociales y ambientales tanto en Galiza como n'asturies. (movimientos rellacionaos cola oposción a la minería contaminante, alta tensión, eólicos etc).
📻 Tolos míercoles podemos sintílo nel programa "Da Lareira a Lameira" en Radio Cerceda, un espaciu radiofónicu de la Asociación Senda Nova dedicáu al patrimoniu cultural y ambiental nel que cada selmana intervién de 12:30 a 13:00h.
📗 Tamién entamó iniciatives mui prestoses como la Revista Abrindo Camiño, una publicación de cálter cultural y ambiental, tamién de Senda Nova na qu'él ye'l director, y na que collaboren delles persones rellacionaes con entidaes, actividaes, asociaciones, movimientos ecoloxistas, culturales, sociales etc🌄🗻 Amás ye un amante de'l monte y la montaña nel sentíu más románticu de la pallabra. Présta-y pola vida afayar nueves rutes, y sobremanera disfrutar del monte y de la llibertá na montaña dende un aspeutu respetuosu col mediu natural y de conocimientu y interpretación del territoriu.
⏱ Ye un amante de los mapes, y la cartografía en xeneral, y présta-y parase nuna campera a interpretar con mapa y brúxula en manu que ye lo que tien delantre.
Güei vamos conocelo un poquitín más, cola nuesa entrevista rescamplu ⚡ :
-Bones Jose, que tal lleves la cuarentena? Ta siendo difícil nun poder salir al monte y disfrutar de la naturaleza?
Hai muncho que facer. Son tiempos de trabayu que tien que servir pa organizase.
-Que llugar te prestaría visitar namás rematar la cuarentena?
L´Azorea Cima. Un pueblín perrguapu del conceyu de Llaviana
-Que podemos facer dende casa pa conocer más la nuesa naturaleza, el nuesu entorno, y disfrutar d'ello dende casa? Que nos propones?
Depende, hai muncha xente que vive nel mediu natural y que ya tien la oportunidá de caltener el contactu col mesmu. Muncha d'esta dedícase a la agricultura, el pastoréu… Una bona propuesta pa los demás ye la reflexón precisamente sobro esos medios de vida y la posible necesidá dun cámbiu al rural. Pero pa goler cuchu.
-Una entidá/movimientu ecoloxista de referencia pa ti:
Munchos, cada unu coles sos característiques. La mayor parte del trabayu de les asociaciones ecoloxistes ta tapecíu polos medios, o lo que ye peor, asoleyando demagoxies de lo que llamen un “ecoloxismu de salón” que pa nada ye real.
Prestaríame nomar cualquier entidá bien pequeña que lluche pola ecoloxía del so territoriu. La Coordinadora Ecoloxísta ye una deses que desendolquen un trabayu enorme y poco vistosu.
-Una acción/actividá que te marcara:
Como toos, les de bien neñu. Aquelles escursiones por Peñamayor.
-Una pequeña acción que podríamos facer cualquiera de nós:
Sofitar una entidá del nuesu rural. Los grupos ecoloxístes y les entidaes del rural tamos nel mesmu barcu por muncho qu´interese separtar.
-Una persona rellacionada col medioambiente o la cultura que te marcara y dexara posu:
Teniendo la suerte de compartir en Senda Nova tantos momentos con tantes persones y tan comprometíes cola cultura y´l mediu natural, diríate que ye un aprendizaxe continuu de xente que me marcó. Amás del trabayu constante, l'amor y compromisu de tantes persones coles que coincido y que tanto aprecio, Xan Fernández Carrera integra una cualidá dinamizadora espectacular demostrada dende va muncho. Préstame nomalu porque desendolca un trabayu cada vez más escasu ya imprescindible.
-Una anécdota que te preste recordar:
Caliau, Corcoesto, Penedos de Traba e Pasarela, Férveda de Entrecruces... tantos llugares que caltienen entá´l so patrimoniu gracies a l´activismu. Contábennos que los proyectos yeren imposibles de parar. Yera mentira.
-Dalgún momentu que recuerdes rellacionau col activismu que nun seya prestoso?
L´actividá constante nuna entidá lleva con ello una exposición a enguedellos ente persones de la organización, collaboradores, participantes, qu'acaben en dolores de cabeza.
Que les alministraciones, sobre too conceyos, s´aprovechen del llabor de les entidaes también da llugar a malos momentos. Pero nada peor que cuando toca ver como nun somos quien d´armar un movimientu organizau pa parar un proyectu antiecolóxicu.
-Sabemos
que te presta facer monte, cuala ye la ruta que más te prestó
facer en toos estos años?Munches. Sin dulda, una delles fué la que me llevó dende Caliau a descubrir el Llagu Ubales.
-Una ruta que nun podemos morrer ensín facer:
Cada un la suya. Esa que tien de llau de casa y que-y sirve pa aprender más del so territorio más averáu. Hai muncho por descubrir ensin viaxar lloñe.
-Salir al monte solu o acompañáu?
Acompañáu.
-Prestaríate tener más conocimientos/formate en:
Prestaríame conocer bien Asturies. Pero creo que me voi conformar con conocer bien l´Altu Nalón. Prestaríame conocer too Redes como un pastor d´Orllé conoz cada cachín de tarrén que llega a Melordaña. Una utopía, claro.
-La to montaña prefería:
Peñamayor.
-Una viesca que destacaríes:
Munchos fayeos del altu Nalón. Por desconocíos voi dicite la Mata Covedrá, en Llaviana. Y después la mata´l Texíu, una viesca de texos y carrascos espectacular, na cara naveta de Peñamayor
-Un animal que pondríes en valor y daríes a conocer más:
Anfíbios, reptiles…los que quieras. Toos tienen un sambenito enriba. El llobu, otru que tal.
-Un ríu que te preste:
Dende neñu siempre me sosprendió´l Nalón: díbemos pa Tarna descursión familiar y dicíenme que nacía na fonte la Nalona; crieme al par del en Los Barreros, tenía la escuela de lláu; y después d´andar daquella varies hores de coche, cruzábemoslu cerca de San Esteban de Pravia, camín de Galicia.
Que grande yera. Y yo que pequeñu.
-Un requexu col que quedasti ablucáu:
Habralu más afayadizu nun día de monte emborrinau, qu´una cabaña guapa onde metese a comer un chorizu y beber agua con bien sede?
-Un país por visitar:
Tengo que parame a pensar porque nun pienso nello davezu. Tengo ganes de visitar la parte francesa de los Alpes.
-La próxima cumbrera que te prestaría xubir:
Vienme a la cabeza Pena Ubina, por esto de que quedé la última vegada a cuarta y cote del cumal comiendo´l bocadillu tortiella. Ya veis entós que m'importen poco los cumales, la verdá. Delles veces digo que debo ser campeón de quedame poco antes de llegar.
-Un llibru que toos tendríamos que tener na nuesa llibrería:
Falando de monte, ta prestándome muncho l´ensayu de Pablo Batalla: “ La virtud en la montaña. Vindicación de un alpinismo lento, ilustrado y anticapitalista”.
-Un llugar nel que perdete y desconectar:
Faime falta poco. Pero polo menos pa perdeme tienen que me dexar salir de casa.
-Un suañu:
Ser capaz de vivir nel rural asturianu con los recursos que me puede dar el territoriu.
L´Azorea Cima.
-Un propósitu personal:
Tengo qu´enfotame nello tovía. Ye de suponer que na llínia del suañu
Cuanto me prestó la entrevista! Amás sirviome a min mesmu pa la reflexón. Munches gracies
Munches gracies a ti por participar, allégrome que te prestara. Y graciés tamién por tol trabayu y la llabor que lleves desendolcando toos estos años, pola nuesa cultura, llingua, y Tierra. Gracies por cellebrar con Clarión el Día de la Tierra 🌍
 |
| Actividá interpretativa cola A.Amb Senda Nova |
 |
| En ruta camín del Llagu Ubales. |
Ningún comentario:
Publicar un comentario