Güelu, por que caen les fueyes na seronda?

 

- Güelu, ¿que páxaru ye esi ? - entrugué con mieu a qu'escapara enantes de que'l mio güelu llograra velu.

- Ye un raitán, ves que color más guapu tien nel pescuezu? - díxome él.

-¿Y que árbol ye esi nel que ta sofitáu? Esi tien fueyes y toos estos d'equí non...

- Esi ye un carrascu y tien fueya tol añu, sirve d'abellugu pa munchos animales pel hibiernu. Toos estos árboles que tienes al to alredor tán ensin fueyes por que yá llegó la seronda...

-¿Y por que na seronda nun tienen fueyes? -entrugué-y.

- Venga, voi cuntante... una vegada va munchos años, un mozu intentaba cruciar una viesca pa llegar a un pueblu cercanu, yera una tarde de vientu, d'agua, y borrín … el mozu deesorientóse y nun yera quien de salir d'ellí, caminaba y caminaba pero nun consiguía llegar al so destín nin atopar el camín de vuelta a casa. Intentó buscar abellugu hasta que la tormenta abocanare. 4 díes y 4 nueches. Dizse que too esi tiempu intentó buscar comida, abellugu y agua y que dalgunos de los árboles del monte negáronse a da-ylo.

- Pero güelu, si los árboles nun falen ho!

- Emmm...bono, Cuando la so familia lu topó 4 díes dempués dizse que'l mozu echó una maldición a tolos árboles que nun-y echaren un gabitu y que a partir d'esi momentu, na seronda ya iviernu (les dómines más fríes del añu) pasaríen xeneración tres xeneración, el mesmu fríu qu'él pasare esos díes. Cayéndo-y la fueya namás entamar la seronda.

- Pero güelu...

- Meca Mira mira! Un picatueru!!!

(...)

Tola mio vida me acompañáron les llecciones de naturaleza y bioloxía del mio güelu. Tardé pocos años n'afayar la esplicación real de por que los árboles pierden les fueyes na seronda, pero tovía años dempués, nes mios clases de botánica na universidá, nun podía dexar de sonrir cada vez que la profesora esplicaba dalgun tema del que mio güelu, años tras ,yá me falara a la so manera y ya me cuntara la so peculiar esplicación.

Dalgunes de les llecciones del mio güelu nun yeren les más científiques, nin les más reales, munches d'elles taben acompañaes de mitos, de lleendes, d'invenciones y sobremanera de muncha poesía. Pero teníen daqué únicu, lo más difícil de too, teníen la capacidá de facer qu'una neña de 6 años se namorara perdidamente de la naturaleza. Enseñaronme qu'avegaes, la imaxinación y la poesia son más importantes que la realidá.

Llecciones que nun nacieron en nenguna universidá o escuela, llecciones que pasaron xeneración tres xeneración de la sabiduría ancestral de los antepasaos de les nueses families. Llecciones con munchos erros y munches llagunes, pero que teníen esa capacidá d'emocionanos, d'espertar el nuesu espíritu observador y les ganes de siguir deprendiendo ya investigando.

Esi amor y eses ganes d'aprender, d'esfrutar de la naturaleza, de protexela, de ponela en valor, acompañáronme toa la mio infancia y tola mio vida adulta, y lleváronme a poder algamar un trabayu que m'enllena cada día y del qu'esfruto como cuando yera neña y pasiaba pel monte col mio güelu. Tolo consiguío ye gracies única y puramente a la universidá de la vida a la qu'el mio güelu asistió cada día, ensin una sola falta.

Piensu en toles hestories qu'el mio güelu me cuntaba, con señardá y coles ganes infinites de poder sintílo anque solo fuera una vegada más, echándolo de menos cada intre mientres camino un día más pol monte nel que tanto aprendí con él.

- Mira ma, que ye esto????

- Eso ye una vacalloria y ye l'escarabayu más grande de toa Europa.

- Meca vaya guapu! Hoo! Pero ta muertu...

- Caro, mira, les vacallories viven casi tola so vida siendo un guxán, cuando camudan y se convierten nesti guapu escarabayu solo viven un par de meses mientres el branu, por estes feches yá nun ye posible atopalos vivos.

- Jo... vaya pena, nunca viera nengún... Mira ma!! mira que páxaru más guapu hai nesi árbol!

- Sii, ye un xilguerín, a que ye guapu?

- Oye Ma, como sabes los nomes de tantes coses?

- home, por que ye'l mio trabayu vida...

- Ya... Ma, mira esi árbol ta secando!!

- Non non , nun ta secando, tamos na seronda, y nesta estación munchos árboles pierden les sos fueyes.

- ¿Meca, y eso por que?

- Voi cuntátelo... una vegada va munchos años un mozu intentaba cruciar una viesca...