Bones llectores! 🤗
Güei vengo a falavos de la que foi la mió primera llectura d'esti 2021.
Adelántovos que me paeció ablucante.
Carboneras treslládanos a un pueblu imaxinariu de la cuenca minera asturiana (Montecorvo, que foi creáu por Alfoso Zapico pa cuntar la hestoria de la Revolución del 34 na so triloxía La Balada del Norte ) , los rellatos tan enmarcaos en plenu franquismu y al traviés de los mesmos diremos descubriendo los diferentes personaxes que viven nesti pueblu y les sos vides.
El llibru fálanos de toes eses muyeres, trabayadores, con remangu, madres, fíes, hermanes y muyeres de mineros, carboneres ... Que vivieron una dómina perdifícil enllena de miseries, de machismu, de patriarcáu, de violencia, de fascismu y de trabayu, munchu trabayu.
Cada rellatu respigóme y emocionóme a partes iguales. Amás toos ellos tan mui rellacionaos unos colos otros y a midía qu'avances na llectura vas completando les piezes del puzzle que conformen toa la hestoria y vides que apaecen nel llibu, vas viendo como tolos personaxes y les sos vides tan mui rellacionaos ente ellos, y como son sofitos unos de los otros.
Una de les coses que más me prestaron y más me llegaron a les coraes foi ver retratada esa xunión, esos gabitos tan fuertes entes les muyeres y en xeneral ente la clase obrera. La manera de sofitase unes a otres en tolos sintíos y el remangu, valor y arguyu que les acompañen cada día.
Paezme un llibru perrecomendable y necesariu pa conocer la vida de les muyeres nesa dómina, y un retratu perguapu de la sociedá minera asturiana. Amás la manera na que ta narrao y les ilustraciones tan guapes que acompañen los rellatos, fai que seya un llibru mui senciello de lleer y qu'engabita dende les primeres fueyes.
Ningún comentario:
Publicar un comentario