Una de les coses prestoses de trabayar nuna llibrería, ye que tú mesma nun yes quien de controlar y saber de tolos llibros que tienes en stock. Entós ye mui senciello, que a vegaes, mientres coloques o llimpies los estantes alcuentres ayalgues y sorpreses nes tos propies estanteríes.
Esto mesmo pasóme ayeri, con esti llibru. Daqué me llamó l’atención, nun se si la portada, el títulu… pero necesité garralo y lleer la sinopsis. Inmediatemente dempués abrí la primera páxina, tovía tando de pie de frente al estante, y ya nun pudi soltalo.
Yera hora de pesllar, baxé les lluces, zarré la puerta. Fixi
caxa, y entamé a lleer. Hasta que a la hora y venti menutos, tenía'l llibru
acabáu, y l’alma desfecha.
Belén López Peiró, ye una moza de 29 años, que pasó la so
infancia y la so adolescencia na mesma dómina que yo y que toes les mis amigues.
Cola gran diferencia de qu’ella foi abusada sexualmente, dende los 13 a los 17
años pol so tíu.
Nun vos voy cuntar de que va el llibru, porque ya lo sabeis
o ya lo podeis imaxinar. Solo puedo dicivos que ye una llectura brutal, na que
Belén amiesta diferentes voces con textos xudiciales pa dar voz a la so hestoria.
Ye una llectura que puede llegar a ser un poquitín confusa si nun tas de verdá
metíu nel llibru o concentráu, por que como dicía, mezcla voces, en testos mui curtios y
ensín títulos o explicaciones, saltando de personaxe en personaxe y dándo-y voz
a toos ellos (a ella mesma, a la só ma, al so pá, al propiu tíu, a la tía, a
les sos primes, a les sos amigues, a la so pediatra, a la psicóloga, al so ex
mozu…) toos ellos van soltando los sos pensamientos y reflexiones, que caen munchos d’ellos
como pesaes lloses enriba de la vítima.
-- “ Y entonces, ¿Por qué volvías cada verano? ¿te gusta sufrir? ¿Por qué no te quedabas en tu casa? allá en la capital cagándote de calor. Ah, no cierto. Que no tenías a nadie para que te cuide. Encima de que te dimos una familia nos hiciste esto.
.
--“Si querida, ¿Cómo no
vamos a creerte? Si sos como nuestra hija. Además él siempre me dio mala espina,
viste lo que le hizo a tu tía cuando era joven. No te preocupes que estamos
con vos. Pero con Florencia (fía del violador) en medio todo se complica. Ella
viena a casa y lo trae a él, y no podemos echarlo. (…) No te olvides que él
cuidó de tus primas como si fueran de su propia sangre. Todos le estamos eternamente agradecidos(…)
Lloses, lloses, y más lloses que la protagonista real, d’esta
hestoria diba cargando sobre’l so llombu. La fía del violador defendiendo a só
pá y arremetiendo contra la vítima, la familia dándo-y la razón de que lo que-y
fixeron ta mal, pero que claro, nun pueden dexar de fala-y o de tratáse col
violador, el so primer abogáu faciendo un trabayu pésimu y echando-y coses en
cara, la so pedietra reconociendo que pudo haber fecho más cuando llegó a la clínica con desgarros y con falses disculpes. Y en xeneral tola sociedá victimizándola y culpabilizándola al mesmu tiempo.
Ye una hestoria desgarradora, que te abre en canal, que nun
fai más que enllenáte páxina tres páxina d'impotencia rabia y dolor.
Una llectura que nun vos puedo calificar con una nota, moralmente, como
bona o mala porque tamos falando de la vida real d’una persona, del so
testimoniu, del so dolor, d’unos sucesos tráxicos y vomitivos. Pero que nun
puedo facer más que recomendávosla porque me parez que la manera na que ta
contada la hestoria, con un llinguaxe directo y claro, ensín medies tintes, y
dándo-y voz a tolos protagonistes, fae que seya más senciello ponenos nel
llugar de les persones que sufren esti tipu de violencia, y de dá-yos voz.
Una llectura ABLUCANTE, que merez ser lleída por toes y toos nós.
Ningún comentario:
Publicar un comentario